Хэнтий аймгийн БОАЖГ, УЦУОШГ, Хэрлэн голын сав газрын захиргаа гэсэн гурван байгууллага улсын төсвийн 2.8 тэрбум төгрөгийн санхүүжилтээр нэгдсэн контор барилгатай болохоор шав тавилаа.
Уг барилгын гүйцэтгэгчээр 2015 оноос эхлэн үйл ажиллагаа явуулж буй “Солармед Монгол” ХХК шалгарчээ. Барилгын ажил энэ сарын 10-нд эхэлж, энэ онд багтааж ашиглалтад оруулах аж. УЦУОШГ-ын дарга Б.Хэрлэнчимэг хэлэхдээ, “БОАЖЯ-ны харьяа гурван байгууллага хамтарч зураг төслийн санааг гаргасан. Уг гурван байгууллагын нийт 100 гаруй ажилчид нэгдсэн байртай болсноор иргэдэд хүргэх төрийн үйлчилгээ түргэн шуурхай болохын зэрэгцээ нэг цэгт төвлөрч байгаагаараа онцлог юм. Манай байгууллага хуучин барилгаа хүүхэд өнжүүлэх төв, уулзалт хурлын байр гэх мэт зорилгоор ашиглах тухай ярилцаж байгаа” гэв.
Дөрвөн давхар бүхий шинэ барилгын I давхарт Хэрлэн голын сав газрын захиргаа, II давхарт БОАЖГ, III давхарт Ус цаг уур, орчны шинжилгээний газар, IV давхарт байгаль орчны лаборатори тус тус байрлах аж. Харин уг барилгын дээврийг ногоон байгууламжаар тохижуулж, уулзалт хурлын зориулалтаар ашиглах мөн зүүн бүсийн суурин станц байрлуулах юм байна.
Д.Одонтунгалаг
