МАН-ын 30 дахь Их хурал хоёр дахь өдрөө үргэлжилж байна. Хуралдааны эхэнд Хяналтын ерөнхий хорооны дарга Б.Баярбаатар өнгөрсөн хугацаанд хийж хэрэгжүүлсэн ажлынхаа тайлан, илтгэлийг тавилаа.
Тэрбээр МАН-ын бодлого, мөрийн хөтөлбөрийг хэрэгжүүлэх, түүнийгээ намын гишүүд, дэмжигчид, олон нийтэд сурталчлан хүргэх талаар санаачилгатай, идэвхийлэн ажиллаж байгаагаа тодотгож байна. Тэр дундаа сүүлийн хоёр жилд болсон УИХ-ын болон орон нутгийн сонгууль, Монгол Улсын Ерөнхийлөгчийн сонгуульд амжилт үзүүлсэн аймаг, нийслэл, сум, дүүрэгт намын бодлогын хэрэгжилт, намын байгууллагын үйл ажиллагаа сайн байгаа гэж Хяналтын ерөнхий хорооноос дүгнэжээ. Энэ мэтээр сайн туршлага их байгаа ч засаж залруулах зүйл нэлээдгүй байгааг онцлов.
Мөн "Дарга нь алсын зайнаас удирддаг болохоор намын ажил эзгүйдсэн, төр, засгийн ажлаа голлон анхаараад намын ажлаа орхигдуулсан дутагдал их байна. Зарим аймаг, сумын намын хорооны дарга судалгааны үр дүн, намын бодлого гэсэн нэрийн дор өөрийн үзэл бодлыг намын хорооны тэргүүлэгчид болон сонгуультнуудад тулгадаг байдал гардаг.
Аймаг, дүүргийн намын хорооны албан тушаалтнуудын ажил үүргийн хуваарь, хүлээх хариуцлагыг тодорхой болгоогүй учраас ажлын давхардал, хийдэл, зөрчил маргаан үүсдэг. Намын дэд дарга нь үйл ажиллагаагаа гардан явуулж байгаа олон аймаг байна.
Ялангуяа шийдвэр гаргах түвшинд намын хамтын удирдлагын зарчим зөрчигдөж, намын дарга, эсвэл цөөн хэдэн тэргүүлэгчийн хүрээнд шийдвэр гаргадаг, дарга нь тогтоол шийдвэрээ ганцаараа бичээд гарын үсэг зураад баталгаажуулчихдаг зөрчил түгээмэл байгаа”-г санууллаа.
