Хэнтий аймагт он гарсаар обьектын гал түймрийн нийт 13 дуудлага ирсэн талаар аймгийн ОБГ-аас мэдээллээ. Түүний ихэнх нь өөрсдийн санамсар болгоомжгүй байдлаасаа үүдэн гал алдсан байна. Тодруулбал, хамхуул хазаар өвсийг дур мэдэн шатааснаас, цахилгааны утасны аюулгүй байдлыг хангаагүйн улмаас, мөн үнс нурмаа ил задгай асгаснаас болж өөрийн болон бусдын эд хөрөнгийг шатаасан үйлдлүүд гарчээ. Өнөөдрийн тухайд Хэрлэн сумын тавдугаар баг шинэ дулаан хороололд иж бүрэн давхарлагаатай таван ханатай гэр шатаж байгаа дуудлагын дагуу ОБГ-ынхан ажиллажээ.Тухайн өрх хашаагүй учир ойр орчимд хамхуул өвс ихтэй байснаас үүдэн хүүхдүүд шүдэнз зурж гал алдсан байж болзошгүй талаар албаныхан хэлж байна. Шинжээчид газар дээр нь шалтгаан нөхцөлийг тогтоохоор ажиллаж байгаа гэнэ. "Хуурайшилт өндөр байгаа нөхцөлд иргэн бүр хариуцлагатай, анхааралтай байх шаардлагатай байна" хэмээн Хэнтий аймгийн ОБГ-ын Гал түймэр унтраах, Аврах 32-р ангийн захирагч Б.Болор-Эрдэнэ ярилаа.
Д.Одонтунгалаг
